Kuwa Gatandatu tariki 15 Ukuboza 2018 kuri Shikan Castle Stadium iri mu Ntara ya North Kurdufan iri mu Majyaruguru ya Sudani niho habereye umukino wahuje ikipe ya Mukura VS ihagarariye u Rwanda muri CAF Confederation Cup na Hilal El Obeid yo muri Sudani, birangira aya makipe yombi aganyije 0-0.
Mukura VS itozwa yakoze impinduka mu bakinnyi bari basanzwe babanza mu kibuga kuko Munyakazi Yussuf Lule yari yafashe umwanya wa Nkomezi Alexis naho Lomami Frank afata umwanya wa Onesme Twizerimana, bituma igice cya mbere cy’uyu mukino ikipe ya Hilal El Obeid yakihariye ariko ntiyinjiza igitego, ahubwo Mukura VS niho yahushije igitego aho umupira wikubise ku ipoto y’izamu aho kujya mu rushundura.
Mu gice cya kabiri Hilal El Obeid yo muri Sudani kuko yari mu rugo yakoresheje imbaraga nyinshi isatira ishaka igitego ariko biranga, birangira Mukura iryamye ku izamu ryayo, umupira urangira ari 0-0.
Umukino wo kwishyura uzabera mu Rwanda mu Majyepfo kuri Stade Huye tariki 22 Ukuboza 2018 ku isaha ya saa cyenda n’igice. Ikipe izatsinda muri izi zombie, izaba isigaje gusezerera ikipe imwe igahita ijya mu matsinda ya CAF Confederation Cup 2019, ibi bikaba bivugwaho byinshi n’abakunzi ba Ruhago yo mu Rwanda by’umwihariko ab’iyi kipe yo mu Majyepfo bavuga ko ubwo Mukura igeze aha n’ibindi izabikora.
NIYONZIMA Theogene
